Connie Pig's profile野蠻豬手記'(oo)'PhotosBlogListsMore  |  Tools Help |
|
April 28 27-4-2007 - 真係一隻大懶豬呀最近睇番自己個部落格先至發覺自己好懶
以前日日都會喺部落格留低自己既喜怒哀樂
而家反而連呢一d都唔去做
話工作忙....又唔係太過喎......話功課忙, 又唔係呀......
究竟點解呢.....唔怕啦....就由今日開始勤力番啦.....
等你都知道我最近係點嘛.....
前幾日因為好多同事都放左假, 係忙左一輪既
但係阿ming番左黎喇, 我可以唔駛咁忙喇...阿ming, 你真係叻叻呀
 呢個星期有d唔同左, 可能短短呢幾個月間發生左太多事喇
我最終都將我內心既野一次過好徹底咁講左出黎
個心真係舒服左好多, 而且自從識左沙田組呢班朋友之後學識左好多好多野
佢地都教識左我好野.........
 好嬲呀~~~因為呢兩日想upload過一首新歌做唔到呀唔知點解......同埋又比我發現我另一個blog果邊都係唔比我upload呀
好唔開心呀...因為我發覺左一首好好聽既歌都想同你地分享呀............
下個月尾考埋試, 我張文憑就正正式式完結喇, 咁就4年喇, 由cert開始到而家
估唔到咁又4年喇.........八月我就畢業喇, 仲有得著袍添, 好開心
一個挑戰既完結, 又係另一個挑戰既開始, 因為我會喺八月入u喇
我將會讀一個工商管理榮譽碩士既學位........一間叫做University of Greenwich(UK)收左我
阿sir話威廉皇子都係讀呢間大學架......final year.....即係讀一年我就係一個大學生喇
我諗最開心既會係我既屋企人, 因為屋企將會多左一個大學生
聽聞仲可以
 飛過英國行畢業典禮架~~~~我當然想同老公分享啦...所以我已經叫左佢儲錢喇買機票嘛...haha..........
今次講住咁多先啦......因為一次過講晒, 下次唔知講咩喇
 April 26 23-4-2007 - 十分、愛今日我又做逃學威龍, 因為公司有好幾個同事都放左假
所以今日好多野做呀, 個人仲做到好攰添
今日仲要揹左鑊添, 個人好唔開心呀
好在放工就見到老公喇
老公今日放假, 落大雨, 佢冇同hello去影戶外
只係走左去影室內
去左沙田既文化博物館...hello仲好滿足, 因為佢影左好多舊相機呀
我地今晚既節目係先睇戲, 後食飯
我地今晚睇<十分、愛>呀, 我聽人講過會好睇
估唔到hello同老公會有呢個節目安排, 都幾好丫
睇完喇~~~真係好好......我會覺得比<獨家試愛>好睇得多
<獨>有同感位, 但係未至於感動, 但係<十分、愛>真係會喊出黎
我聽到4圍都有人攞tissue出黎既聲, 證明呢段戲真係叫人感動
有一句, 我好鍾意既對白, 就係'睇到既未必係真, 真既又未必睇得見....'
人真係咁架~~~~~~
請你都好好細味呢一段戲講咩丫
April 15 10-4-2007 - 點死好呀~~~悠長既假期咁就結束左喇
今日仲要test添.......琴晚先至開始溫
都未溫得晒架...點死好呀
好在, 老闆又飛左, 我可以溫下書, 唔係都唔知點算喇..... April 10 8-4-2007 - 剪頭髮今日好似好忙咁.....一點就比老公嘈醒
真係好少何佢會早醒過我架
我地梳洗好, 跟住就番香港喇
好多人呀~~~~~可能個個都諗住今日過關少d人啦
好在都唔駛等好耐.......今日真係好多野做咁喎
因為約左edith剪頭髮....但係我地遲左....再加上佢公司有幾個junior今日冇番
咪搞到"哩咁hea"囉........本來想做treatment都唔喇, 因為唔想阻住edith
同edith傾開計, 都幾舒服架.......
老公剪好先, 佢就幫我番屋企攞衫
之後本來佢話出黎join番我, 因為諗住同hello同kie kie去扭蛋show, 但最後取消左
咁我就番屋企搵老公喇.....番到黎我見到佢好乖咁幫我摺緊衫呀
仲吸埋塵添...............haha.....估唔到呀.......真係好開心
大約十一點到, 本來諗住同沙田組食飯啦....但係一個二個掛住打機
冇出黎, 咁我地兩個食囉....食飽飽番屋企睇電視
今晚now有得睇<再說一次我愛你>........好hard feeling呀
仲喊添............ 7-4-2007 - 老公放假喇~~~首先要同阿仔講生日快樂~~~~~
老公今日終於都放假喇.......yeah.....連放3日好野
我地今日要同爸爸媽媽去拜老公既太公同嫲嫲
一早就要起身喇..首先要去鑽石山, 之後再去將軍澳
除左拜年果日, 今日就係最齊人既一日喇
所有既阿叔同姑姐都見齊, 仲有阿爺同哥哥
一共有十二個人咁多呀......我地仲喺官塘食左好好味既牛雜粉
好耐都冇食過喇~~~~~
大約四點到番到屋企啦~~~~今晚又約左沙田組食飯喎
食完飯我地就北上喇....又係我同老公兩個人北上
我同老公計劃左好耐想北上揼骨, 一直都冇...因為老公之前要番學
終於都等到喇~~~~~~本來想join埋阿tif, 但係佢又唔見影喇
唯有我地兩個啦......老公個傻佬到左深圳之後話要睇下去邊間揼喎
搞到成班姐姐喺我地面前係咁吱吱喳喳.......煩死喇
最後都係去左娛樂航母.......今次係去大d果間, 我都未去過架
真係好大架, 我沖完涼出到黎唔見左老公都要send sms比佢
嘩~~~~好抵呀.....兩個人都係$560......又按腳, 又修腳, 又按頭, 仲要做埋個航母式按摩喎
我仲學人玩線面添呀........
要同老公諗下幾時又上先得....hehe April 09 6-4-2007 - 火間土....yeah今日老公都係要番工, 本來好想攞衫落街洗
但係.....今日係星期五, 洗衫舖星期五下晝係放假架.......咁點算呀.....
唯有聽日先至洗啦~~~~~
我地今晚又約左人食飯喇
係呀~~~~約左我阿仔呀.......因為佢個傻仔聽日生日嘛
我四點左右出左門口, 因為我先要番公司攞d野先
再過尖沙咀接老公, 過到去佢又未放得工喎, 咁啱又比人叫左佢去做野
等左佢一陣啦....跟住陪佢去換衫
換完衫我地就去左買生日禮物比阿仔喇
個仔鍾意大口仔架喎.....我4月4日生日既朋友小陶都係鍾意大口仔架喎~~~
唔通白羊座既人特別鍾意大口仔???? 不過都冇乜根據既~~~我係咁講下架啫....hehe
我買左一個<怪誕城之夜>既鎖匙扣比佢, 我諗住呃下佢, 只係買左呢份禮物比佢
點知去到火間土樓下佢話已經睇到我另一份禮物喇....shit.....計劃失敗.....
我地三個人食左好多野, 好開心呀.....仲影左相添...要等我個仔send番比我先至有得登比你地睇喎
各位要等下先喇~~~~
今個星期已經第二次食火間土喇.....因為前兩日同hello, 仲有kie kie去食
好開心呀.........yummy.................
跟住就去左車房玩.....多謝mic黎接我地兩個......今晚好齊人呀......
連vicky同阿花都喺度呀....我地三個哩埋喺bosco架benz入面打孖寶賽車
三個...呀~~唔係呀...加埋bosco係4個呀...玩到傻晒...仲要喺架車入面大叫添
haha~~~~~~好開心呀.......
日子其實可以過得好開心, 睇下你點睇架啫~~~~~ 5-4-2007 - 悠長假期展開~悠長假期展開的第一天.....
haha.....真好.....一連放五日假由今日展開
其實都唔係架, 因為我老闆琴日已經唔喺公司
我當琴日已經係架喇...wahhahahhaa
因為今日老公要番工, 我又訓到好晏喇
訓醒之後, 我乜都冇做過, 話明放假丫嘛
做咩啫....hehe
因為今晚約左sammi食飯, 大約五點半左右
我約左老公喺尖東站等, 一齊過海
我地已經遲架啦.....點知sammi都仲遲過我地, 最準時果個都係vienna喇
我地今晚去食法國私房菜, 係喺上環一幢商業大廈入面既
我地一共食左十道菜.......有龍蝦仔沙律, 法國蟹白酒燴天使麵.....仲有自家製蘋果批做甜品
平時我係唔會食蘋果批架.....但係呢度整既竟然係唔會覺得溜架.....
yummy......成餐都好好味呀.....食飽飽就番屋企喇
因為老公聽日仲要番工呀......
April 05 4-4-2007 - 快樂的時光番工番埋今日就放假喇
個個番到公司都唔係好想做野......全因為個個都有holiday mood
好期待放工, 點解今日d時間過得咁慢架.....
放工之後過左尖東接老公放工
因為今晚我地有一個好重要既約會呀.....
係呀......就係去一個我識左十年既朋友女既開心快樂生日會
我地一班大朋友今晚唔係去唱k, 唔係落酒吧, 更加唔係去disco
我地今晚呢個生日會係去麥當當呀.....
最初小陶邀請我既時候仲以為佢講笑....點知佢仲send埋邀請咭黎
我當然要應約啦.........因為呢個都係我既第一次
都係小陶既第一次, 都係老公既第一次......哈哈
九點鐘準時到逹又一城新裝修好既麥當當
主角已經喺度喇.....送左一份佢唔知鍾唔鍾意既
 禮物比佢影下相.....食下野..........仲有遊戲玩添
咁又過左兩個鐘喇..........哈......臨走仲有每一份禮物拎走架
我仲講笑話出年幫老公喺麥當當搞一個開心生日會添.....
小陶.....好多謝你請我去你既生日會呀
希望你開開心心.....記得下次番黎香港既時候又約食飯喇
生日快樂!!!!!!!  April 02 31-3-2007 - 愉快的週未琴晚照舊同沙田組食飯, 正當我同老公準備落車房之際
mic就打黎話我地知, 佢上黎火車站接我地
之後, 我地兩架車5個人就番尖咀果邊等vicky收工
咁就番河畔食飯喇........
呢個週未過得好開心, 並未因為一d小事影響到我既心情
相反, 仲因為一件咁既事, 令到我感受到朋友既關心
星期六既上晝第一個電話打黎既係阿feel, 頂丫
八點幾打黎嘈醒人, 問一陣駛唔駛做禮喎
跟住九點又到一個日本人打黎, 話比我知佢已經將$30放左喺管理處, 等順豐既人去派件
再到十點, 就係我契仔個老豆mic打黎, 話比我知, 我要準備出門口
出門口做咩~~~~~今日係沙田組07年第一單喜事呀.....就係rex同shirley結婚
真係恭喜佢地兩小口子, 雖然佢地年紀仲細, 兩個都係廿一歲
但係佢地兩個有勇氣去承擔婚姻呢一個責任, 我好欣賞佢地
祝佢地執子之手, 與子偕老.....
睇完佢地行禮之後, 我地就去左同佢地食午飯
食完午飯又要怱忙趕番屋企換衫, 因為今晚係沙田組燒炭之夜呀
我, 阿花同阿mic三個人負責買野, 好犀利呀, 因為我地要負責買三十人既野呀
好怱忙咁買左要醃既野先....跟住就上左阿花屋企做大廚喇
仲同佢屋企既貓貓玩添....之後我地3個就join埋ivan同我老公
去百佳買野, 之後我地就兵分兩路, 老公佢地出車房卸貨
我地3個去大成街街市買野....到左大成街差唔多七點半喇
我同阿花兩個好似絕地狂奔咁....跑住去街市, 好在仲有一間凍肉舖未閂咋
我地買晒佢地有既野同埋沙田組員要食既野
就番車.....mic已經攰到喺車訓左喇
跟住我地又番車房卸貨, 然後再3個出發落旺角攞蛋糕同尖東攞野....好趕呀
終於八點左右, 可以集合埋大家一齊出發喇
起初, 大家仲分散左行, 好在最後都可以喺彩虹join埋一齊
玩到兩點半就番屋企...................
雖然成個過程有d激氣...但係都好開心
辛苦晒阿花同mic............
 |
|
|
'%3a+April%2c+2007&referrer=){kind=small}
