Connie Pig's profile野蠻豬手記'(oo)'PhotosBlogListsMore  |  Tools Help |
|
November 24 23-11-2006 - 辛苦到嘔篇今日又係公司既event喇
今日係喺君悅酒店幫一個馬主攪生日
其實呢個星期都好忙, 就係因為為左呢個event喇
因為當中有一部份, 我係要負責既
就係一個珠寶既silent auction喇
又要開會商討攞邊d珠寶去做啦......又要掛好價錢牌啦.....唉~~~~
冇辦法啦.....鬼叫自己個老闆係做珠寶架咩.....
琴日一早就要番到公司, 因為亞ming要去銀行
所以前一晚已經叫我早d番, 咁我地公司一向都視大家係一家人
我梗係會啦.....所以特登搭早一班車, 咁就可以喺八點十番到公司喇
因為前一日已經揀好晒珠寶喇, 今日要做最後準備功夫
本身以為好地地啦, 點知到左下晝又要出去深水埗
因為份紀念品要買個紙袋袋住喎........一個人去買400個紙袋呀
拎到番架車到, 隻手都震埋呀.....好慘呀~~~~
番到公司開會既時候, 拎本簿都拎唔到........手軟喇.......
開會突然收到個消息, 就係要攞晒公司d珠寶去賣
仲要每一件都hang價錢牌, mark數, 對數..........好在有成班同事幫我
Annie啦, Crystal啦......仲有亞Ming同Uncle......好warm呀.....
所以我話出糧我一定會請佢地食飯.....
放工既時候都差唔多八點喇, 亞Ming因為咁冇番跳舞堂
輝輝喺旺角同Hello等我食飯, 我就同亞Ming一齊搭車落旺角
草妹就喺隧道口個巴士站等我架巴士黎, 一齊落旺角
最主要係要幫輝輝買條皮帶, 因為佢今晚都要幫手嘛.......
到左大日子喇, 一早就執好晒要帶去既野喇
例如, display用既盤啦.....頸啦.....介指同耳環托.......
仲要幫我老闆整埋個price list......準備就緒出發.....
輝輝一早就到左, 因為佢攞左兩個鐘頭假.....等我地
去到又要忙一輪, 因為酒店既配合同我地有d出入......結果...
everything goes over run........我又企左成幾個鐘....著住對高踭鞋
仲要成晚都係要做野, 咩都冇食過, 飲過兩杯香檳
就係咁多......真係認真唔好受呀........
好在到最後成班一齊都去左打邊爐
但係都要成兩點幾先至番到屋企......
黎緊十二月又做喇.....希望到時唔會再係咁啦.....
November 21 19-11-06 - 延續打雀篇今日因為輝輝要番去OT, 所以我可以訓晏d
但係講緊都係訓到十二點
因為佢放十一點九.....番到黎都差唔多十二點三
佢又掛住訓喎, 所以我就等佢訓到咁上下先同佢去食野喇
因為今日約左佢表哥去補鐘
所以時間舖排有d密....都好既...咁先至似放假架嗎...
同輝輝個表哥補完鐘之後我地就番番出沙田喇
因為又約左草妹打牌...我呢個妹就最鍾意打牌
今晚有亞欣, 亞拔仲有業仔, 大家都係好少上落
結果....我地又輸喇......輸左$260
大家都係差唔多, 得草妹一個贏
我地就等於夾錢食飯喇.......  18-11-06 - 體力勞動篇今日輝輝放假, 其實我都係架
不過, 我就要一早起身, 因為今日係全家總動員去拜山既日子
媽媽九點打電話叫醒我.....死喇....做咩自己校左鬧鐘聽唔到呀~~~~
立刻梳洗.....怱怱咁離開屋企, 落到樓下巴士都唔等
見到的士即刻跳上去呀......
梗係啦...遲到喇
番到屋企樓下, 已經見到佢地搬好晒野上車
準備出發, 我見到爹嗲佢好似好辛苦好痛咁
媽咪同伯娘話佢可能因為神經痛喎~~~~~
我真係好擔心, 因為我從來都未見過爹嗲病得咁厲害
自願要去睇幾次醫生架......佢真係好似老左好多呀~~~~
左走右走.....拜完山番到屋企三點喇
點解咁辛苦, 因為我今日要做埋爹嗲果份
就係要幫手除草同化寶喇......
其實我覺得我可以為爹嗲做既, 我去做都冇所謂
因為我係佢地唯一一個女, 我好愛佢地架~~~~
番到屋企已經係下晝三點喇
雖然好攰, 但係因為屋企有好多野都未做
所以要做左先.....攞衫落街洗啦...吸塵啦....
之後八點左右就番左乙明, 因為輝輝既媽媽留左粥同湯比我地
叫我地番去清晒佢....真係好飽呀
睇埋<肥田>咁就番屋企喇.....其實想睇埋<15/16>先
但係輝輝又要催住番屋企喎.....扁咀......
因為個大帝聽日要番去OT, 所以好早就訓喇
今日體力勞動完, 所以我都想訓喇....早抖!!!  November 20 17-11-2006 - 大吃一頓篇話說我個仔EC因為要儲元氣印仔繼會
今晚約左我食飯, 我同輝輝啦, 仲有亞仔三個一齊去食元氣
因為輝輝要OT, 亞仔又要去唔知邊度幫佢果班童軍仔攞旗...
所以要晏先至食得.....
我放工....斯斯然咁行去搭隧巴
差唔多六點七, 輝輝打比我問我喺邊喎
仲話我做咩放工唔打比佢, 咁平時佢做野我打比佢
佢會話我阻住佢架嘛.......今日我見佢OT咪唔打比佢囉
佢就話我知叫我到左打比佢, 因為佢唔喺A地喇
一去到新文華, 第一時間打比佢啦
又輪到佢冇人聽喎.....哼......
然後就見到一個熟識既面貌喺詢問處喇~~~
佢係邊個?!?! 佢咪係Hello囉......佢因為有事, 所以冇黎神氣
我叫佢唔好咁...我仲將啱啱喺收音機聽到學番黎既同佢講
就係"搵到一個人, 然後叫自己相信你同佢係一對prefect match"
並唔係, "相信呢個世界上, 有一個人係同你perfect match, 而去搵呢一個人....."
係咪好深呢.....其實一d都唔深, 我相信我可以做到既~~~~~
 之後, 等到輝輝放工, 我地就出發落旺角喇
今日揀左去朗豪坊既元氣......
諗住唔係咁多人啦......點知........我同輝輝都早到
亞仔遲左.....等左唔知幾耐......終於都有位喇.....
我你他....三個人....食左十幾碟野.....嚇死人喇~~~~~
飽住咁番屋企, 仲話要番乙明飲湯喎.....  實肥喇!!!!November 17 17-11-06 - 部落格的世界篇今日先至發覺, 原來好多人都擁有部落格
好似我咁, 我都有多過一個部落格
而我有好多朋友都好似我咁...擁有一個或以上既部落格
有時發覺部落格既發明好偉大
因為佢可以同朋友分享自己生活裡面所發生既
所見既, 同所遇到既.........開心同唔開心都可以寫落去
好似一d好耐都唔見既朋友
透過部落格, 至少可以知道佢地發生緊咩事
透過部落格, 分享佢地既喜同悲.....
呢兩日都好唔夠訓, 幸好今日係星期五
因為聽日就放假喇
但係我怕, 聽日都係要早起身
因為要去拜山......大家一定覺得好奇怪
點解重九都過左咁耐, 我先至去拜山呢
因為我屋企好多人, 又要去好多地方拜山
要就晒咁多人, 同避開擠滿人既重九拜山人群
遲......都係好既~~~~
大妹, 好耐都冇聽過你把聲
突然想起打比你......點知....照例你又係忙緊
唔緊要啦....你要努力同比心機呀.......
草妹, 你都要努力.....堅強同開心d呀......
一次過唔可以同晒咁多我既朋友講咁多說話
但係, 都係一句啦....希望你地個個都開開心心
生活愉快.......
November 15 14-11-06 - 勤力上學篇琴日做完懶豬之後
今日要捨棄師兄, 做番隻勤勤力力既叻豬先~~~~
今晚好乖, 放工之後就即刻番學喇
好在公司樓下有車直接番到學校附近
仲可以等埋sammi一齊行番學校添
今晚番培正campus, 唔係咁鍾意呢個site
因為實在太隔涉喇.....好遠呀.....番屋企都遠呀~~~~
仲要捱多幾個月呀.....一定要努力呀!!!!
比心機呀...野蠻豬!!! Yeah...Yeah....Yeah~~~~~~  13-11-2006 - 逃學篇比亞芯睇到呢篇BLOG, 我知道佢一定會鬧我
點解?!?! 睇個Topic都知啦......佢又會話, 呢頭又話比心機
果頭又唔番學.....hehe.....係呀, 因為走左去同師兄
仲有佢老細, 即係亞sir, 去左飲野呀.....
因為唔想番到學校一陣酒味, 經師兄批准之後...hehe......咁就逃左學喇
公司今日洗地毯, 全人類都可以早走
早走兩個鐘, 即係四點......但係我都要四點半先至走
因為我老闆差唔多臨走先至比野我做....
洗地毯d人都到左喇....快d啦........
做好晒野, 怱怱咁離開左公司, 就過左新文華
番舊公司探同事同埋等師兄
其實, 呢個時候既我都仲係諗住番學
直到我探完舊同事, 師兄打比我
同我講, 亞sur搵佢飲野喎.....本身諗住同佢一齊走既我
就跟左佢去飲野喇........
奇怪地.......師兄竟然第一次, 係第一次喺文華既A1公然拖住我
果一刻, 我都有d愕然同驚喜.....因為佢喺未試過喺文華既範圍拖住我架....
我初次感受到被佢重視, 同埋佢的確為我做左好多野
改變左好多.........  November 13 12-11-2006 - 打雀篇好似好耐都冇打過牌
今日輝輝放假.....我地差唔多一點先起身
睇完新聞落街食野
然後, 節目安排得非常緊密
 首先, 要攞番洗好既衫番屋企先
然後, 就番過乙明, 因為輝輝要番過去攞番d野喎
再者, 就係約左草妹打牌喇
有好耐好耐都冇同過草妹打牌喇
我諗都有半年至一年喇~~~鬼咩...我打親都輸既
 唔打好過打......今次都唔例外, 又係輸
最初, 當我櫃筒輸淨一個紅色既時候
真係心都慌埋呀.....好在, 到最後都可以追番
輸三百蚊, 輸少當贏啦.......
唔知由幾時開始, 我睇得好開
輸就輸........輸少d, 都會開心d架喇
最多唔好打咁多囉.........打到十二點, 番屋企
沖完涼, 執好晒d衫, 諗住訓啦.....
下~~~點知鼻敏感訓唔到喎.....
結果, 都係四點鐘, 食左粒藥先至訓到覺.....唉~~
一轉天氣就麻煩......  11-10-2006 - 早起篇今日真係早起身呀
未夠十點就起身喇......點解
咪又係d什麼什麼公司既推銷, 同什麼什麼師傅上黎整野
攪到本小姐一早就比電話嘈醒
 因為我係用netvigator既, 咁now寬頻電視送多部機比我
所以, 連媽咪果邊都有得裝
媽咪果邊十二點就有師傅到幫佢裝機
但係我就要等到四點
但係我一早就要起身, 一來媽咪果邊裝機係打比我既
二來, 十一點又話有家居深層清潔既人上黎推銷
一部空氣淨化機同一部吸到塵蟎既吸塵機
唔吸都唔知原來我張床咁污糟架.....
好想買果部空氣淨化機...
 但係輝輝話貴, 叫我唔好嘥錢買喇喎....一直等......等到五點...now既師傅先至上黎
一上到黎, 左睇右睇, 又話裝唔到.....根本佢就係唔想搬開我個雪櫃
攪到我等左佢成日...離晒譜,
我一定會打去佢公司投訴架!!!!好在一直都同個net fd Simon喺msn入面chat, 唔係呀~~~真係會悶死我呀
講開呢個net fd, 我係喺香港討論區入面識架
咁啱佢又係住沙田, 大家都講開自己間屋, 同業主有幾煩
咁就覺得好啱傾, 再架上佢又有車喎....可以有好多話題啦.....
之後, 同hello, 佢女朋友tiffany, 仲有輝輝去食魚米之鄉
hello佢仲買左部canon 400D, 攪到我都心郁郁想買
想買左過聖誕, 因為可以試下自己影相...yeah.....
 都係諗下先啦.....因為要成6500蚊架....真係有d貴!!10-11-2006 - 泰國菜篇呢輪不停咁四圍搵野食
又食意大利菜, 又食避風塘炒蟹, 今次就去九龍城食泰國菜
遲d仲會同sammi去上環食上樓既私房法國菜
諗起都流口水呀~~~但係我就黎越食越肥喇.......
今日放工即刻過尖咀
因為輝輝一早就等緊我
我地渣車車去九龍城, 因為同事亞ming介紹我去食一間
叫做"泰農"既泰國菜....
結果, 兩個人叫左三餸一湯, 叫左一個咖哩炒蟹啦..
半打串燒, 一碟馬拉盞炒菜, 一個細既冬蔭公湯
仲要加埋個蒜蓉包, 食到我地兩個都飽飽呀....
亞ming仲叫我地去食埋糖水添呀....
但係因為實在太飽喇......食唔落喇
本來叫埋鐵夫去架..但係佢又話唔想做我地既電燈膽
所以冇跟黎......
番到屋企先至係九點幾, 仲趕得切睇<萬千星輝頒獎典禮2006>
結果真係出人意表呀........
November 11 9-11-2006-豬先生...豬小姐?!?!豬先生 雖則天真的蠢豬 我未博得歡呼讚譽 然而有你愛上我的短處 快樂也許不必富庶 繁盛世界慣了以冷眼 去看我滑稽的際遇 能令你去發笑也有用處 我用傻事去捐輸 ＊多麼蠢的蠢豬 個個也來揶揄 高攀不起公主 並沒段段艷遇 悠然面對這悲劇遭遇 齊集給了你當笑話書 多麼蠢的蠢豬 愛上那條人魚 即使爭都爭輸 仍然從未怪罪於天主 自信戀愛運很特殊 明日你前來叫我蠢豬 講愛情暗語＊ 即使悲觀的烏龜 我亦看出牠的美麗 仍然有你愛我我都矜貴 快樂要先拋開智慧 誰又會似隻蟻去獻世 各有各獨一的瑰麗 同樣你愛錫我 哪有代替 証實人沒有高低 開心多麼簡單 要愛有何疑難 不必苦苦支撐 但願是是但但 誰人自怨說生活艱難 成就只怕要勉強高攀 開心多麼簡單 那怕愛人平凡 A餐B餐C餐 原來無論吃甚麼早餐 共你的每日都燦爛 而幸福秘訣太過簡單 於好處著眼 REPEAT＊ November 09 7-11-2006 - 抽血篇今日放半晝假, 係因為補番上一次公司做event既半日ot
好開心, 因為今個星期又可以番少半日工嘛
講到自己好似好懶咁添......
可能因為開始番番學啦, 個人好攰
成日都好似唔夠訓咁, 我就係咁架喇
一番番學個人就冇精神, 希望讀書既日子快d完啦.....
琴日睇到亞芯喺blog到留比我既說話
我會比心機捱埋佢架, 讀完書dip, 我估會好好多......
我都要為自己打算下, 所以我會比心機讀書架....你唔駛擔心!!!
見到亞芯既留言, 又令我諗起我另一個朋友鐵夫
唔知話佢蠢好定係懶好.......我估佢都有睇我呢個blog架
但係就偏偏唔留言同唔識留言.....唉~~~~~
放左半晝, 去左搵伯娘, 大家都可能覺得我好奇怪
放假唔係去玩, 係去搵伯娘?!?! 係呀, 因為我要去抽血驗
下~~~抽血驗?!?! 大家係咪好驚我有咩暗病呢~~~唔係, 係因為我一年前打左支肝炎針, 但係到而家都驗過有冇抗體
所以, 伯娘叫我去抽血驗下啫.......你都唔好話...上次捐血都好痛架啦.....
抽果少少血之嘛....都可以咁痛既.....不過算啦....為健康著想, 痛d都冇所謂啦.....
今晚偷懶冇番學, 行左一陣九龍灣, 食埋飯跟住番左屋企
係呀~~~因為又要睇肥田囉!!!  8-11-2006 - 林狗~~我黎喇篇今日十分之緊張
因為今日係亞jan, 林海峰-踎底噴飯, mahattan id咭優先訂飛既大日子
我一早起身就即刻send一個sms比亞仔提佢
到左九點半, 亞仔send sms話我知佢打左半個鐘電話都唔通
我就決定同佢分開打
上討論區見到, 好多人都好努力咁打緊
仲緊張過book場打波, 同book時間結婚呀~~~~
時間一秒秒咁過去, 到十一點我同亞仔都係未打得通
開始好擔心..........
到十二點左右, 我打通第一個電話
電話叫我輸入左個咭number之後, 竟然話服務已經終止喎....
究竟發生咩事呀.......好擔心究竟係咪已經賣晒飛呀??
再上討論區到睇下啦.......好多人都有我類似呢個情況
結果, 我同亞仔都放棄左......把心一橫都係諗住等佢公開發售先至再買.....
放工第一時間衝番屋企, 因為再pccw積分換左兩張cash coupon
一張係惠康, 一張係萬寧, 兩間都喺正我屋企樓下....開心.....
順便去買埋飯番屋企食...因為要睇肥田嘛......hehe
九點三、四左右再收到亞仔既sms, 佢話佢打過去, 但係喺客戶服務
所以我決定再打去試下, 真係通喎.......第一次錯過左一個機會
原來, 手提電話講緊係唔可以用音頻function架喎.....死得啦....
再打.....又唔通...唔係玩我卦!!! 好在打多兩次就通喇
但係等左超耐囉.....之後又要入id喎....咪即刻打比亞仔救駕囉....好彩.....趕得切
唔係又要打過, 我真係唔得你死呀~~~~~
一切順利....訂左12月16號.....yeah
林狗....我黎喇!!Jan...Jan我黎喇!! November 07 6-11-2006 - 回顧篇睇到自己個日記先知, 原來自己有成兩個禮拜冇打過日記喇
除左用一個<懶>字黎形容自己之外, 真係諗唔到有其他
過去兩個星期做左好多野....
去左睇戲啦, 睇左兩套戲, 一套係<死亡魔法>, 一套係<妄想>
睇完都唔知兩套戲想講咩, 睇<妄想>, 唔係睇到個尾都唔知套戲想講咩呀
去左拜山啦~~~~但係就唔係拜我爺爺, 嫲嫲, 係去左拜輝輝既嫲嫲同婆婆
又去左灣仔食避風塘炒蟹啦......
又真係幾好味架喎~~~
剪左頭髮啦~~~~因為個頭d髮尾燶晒要去剪咁d
但係番到公司, 同事亞Ming話都唔止d喇喎......
天氣開始轉涼, 好開心架, 因為又可以打邊爐
d冬天衫又可以著番出黎, 但係今年冬天可能唔會點買衫
一來租左屋, 開支大左啦.......二來就係想儲番d錢
好似好耐都冇去過旅行喇, 想飛去第二度散下心
但係都係想下架啫, 還晒d咭數同d債先至講啦
希望公司快d加人工就好喇......
 今晚開始番番學喇....Sammi我既好同學讀埋呢個sem就畢業喇
但係我都仲要讀埋下個sem, 開始好擔心, 因為我知道自己係一個咩人
有人陪我, 做起咩事上黎都會比心機d, 用心d, 但係當佢地都讀完既時候
我真係有d擔心自己做唔黎~~~
30-10-2006 - <勇>篇今日喺屋企download歌仔黎聽
忽然諗起呢首歌, 覺得歌詞寫得好好
仲好有意思添~~~~
|
||||||
|
|
'%3a+November%2c+2006&referrer=){kind=small}
